فن التركيز

أعتقادي أن السنيما فن التركيز .. والواقع هو فن الشمولية والعموم !
يعني مثلا في الفيلم بنركز على شخص معين او إحساس معين او تجربة معينة . لكن الواقع متشابك ملىء بالأحداث اللى لا ليها أصل ولا فصل أهى بتحصل وخلاص 
علشان كده السينما بتشدنا لأنها بتخلينا نركزززززززززز
ولكن مع الوقت بتبقى فن "الأوفر " والأوفر قوي كمان . يعني مثلا قصص الحب حاجة كده تخنق بصراحة ومش ممكن تلاقيها في الواقع .. يعني ايه واحدة تمّوت نفسها على واحد سابها ؟؟!!
ويعني ايه الولد يعيط علشان البنت سابته .. حاجة أوفر
يعني ايه الراجل يجري في الشارع علشان يلحق حبيبته قبل ماتسافر بدقيقة ويقولها قدام كل الناس انه بيحبها والناس تقعد تصقف وهى تعيط وتنزل الموسيقى التصويرية في الآخر . طيب انا عايزة راجل يجرب يعمل كده في مكان عام ويشوف اللى هيحصله :)).. يبقى يقابلني لو عرف يمشي في شارع تاني
الحب في السينما مريض مليء بالعيوب والنواقص .. بالغدر والهجر والألم والعذاب ووجع القلب  والعياط بقى وغيره
مع ان في الحقيقة الحب يجب أن لايحمل كل هذه المشاعر .. إذا كنت تحب فإنك لاتأذي أبدا . لاتجرح . لاتسبب ألما .. لأنه سيصبح وقتها حبا معيوبا داخل قلب معيوبا أيضا
الحب اللى بجد بيخليك سعيد .. تعطي بلا كلل ولا ملل .. تسعد لرؤية حبيبك سعيد  .. تختار راحته وأمانه وقربه عن طيب خاطر 
واللى يغيظ بقى ان الفيلم كله يبقى وجع قلب وينتهى نهاية سعيدة !!!
مع ان في الواقع مفيش حاجة أسمها نهاية سعيدة أصلا
ولذلك أيضا حديث آخر