الزواج !! وأشياء أخرى.

**أنا هاتجوز وأقعد في البيت!
دى كانت إجابتي المعتادة عن السؤال التقليدي السمج الذي يسأله كل "عمو"سخيف وكل "طنط" غلسة .. عايزة تشتغلي ايه لمّا تكبري؟؟ ... وإجابتي "انا مش عايزة اشتغل، انا عايزة اتجوز واقعد في البيت واجيب عيال كتييير !"
تاركة لهم الصدمة ولأهلي غالبا الأحراج .. وينتهي الموقف بضحك هستيري من الجانبين.
وبرغم رغبتي الحقيقة في انى يكون ليا حياة عملية ناجحة لكن الجواز كان اولويتى بصراحة .. من ابتدائي وانا عارفة مواصفات فارس أحلامي وشكل فستان فرحي بصرف النظر ان المواصفات دى كانت بتتغير كل يومين :)
الغريب فعلا اني مكنتش عايزة أعيش قصة حب مثلا!.. مكنتش مقتنعة بعذابه وسهاده ووجع قلبه ! الحب كان بالنسبة ليا هو الجواز. يعنى انا هاحب اللى هاتجوزه، هاتجوز الأول وبعدين أحب براحتي بقى .
وبناء على ماسبق ولما وصلت للمرحلة الثانوية كانت حكايات البنات العاطفية في عنيا "إستهبال" وفي المرحلة الجامعية "تضييع وقت" .. أما فراق المحبين وعذابهم والزمن اللى فرقهم والظروف اللى وقفت بين تحقيق حلمهم في انهم يعيشوا مع بعض بقية عمرهم " انتو أكيد بتهزروا !!"
المهم ربنا بعتلي نصيبي "زوجي المستقبلي" .. علشان أكتشف اني مش مؤمنة بالخطوبة أصلا لدرجة إنى كنت رافضة أكتب تاريخ الخطوبة على الدبل علشان نكتب تاريخ الجواز بس!
وطبعا قدام نظرة "البنت دى مجنونة ولا ايه؟" تراجعت عن موقفي :)
ومرت الخطوبة وجاء يوم الفرح
ولايزال هذا اليوم هو الأروع والأسعد في حياتي، لم اشعر بمثل هذه السعادة لا اقبله ولا بعده حتى يومنا هذا " كان يومي أنا" :)
ومع توالي ايام الزواج الأولي صدمتني الحقيقة!
الجواز مش زى اى حاجة اتمنيتها ولا اتخيلتها!.. الجواز كان حاجة مختلفة تماما، ليس بالضرورة افضل ولا حتى أسوأ إنه فقط "مختلف" ....
**أنت مين؟
أولي صدمات الجواز هو إكتشاف وجود"شخص آخر"
نعم.. هذا أجمل مافي الجواز وأسوأ مافيه!
وتتوالى الأيام ويكتشف كل راجل وست ان البنى آدم اللى ارتبط بيه طوال فترة الخطوبة واحيانا ماقبلها مش هو نفس البني آدم اللى اتجوزه! 
مش عارفة تحديدا المشكلة في ان الشخص بيتغير فعلا بعد الجواز او انه لم يفصح عن شخصيته الحقيقة قبله أو ان نظرة الواحد بعد الجواز بتتغير تماما لكل حاجة ، بيشوف الدنيا أصلا بشكل مختلف!
كل اللى أعرفه انى وبعد اكتر من عشر سنيين لسه باكتشف في جوزي حاجات جديدة ماكنتش اعرف عنها حاجة!
**اروح لمين؟
بيحصل نزاع جوه كل زوج وزوجة وخصوصا مع البنت في بداية الجواز بين اهلها وبين جوزها وحياتها الجديدة ودايما بنسمع جملة ثابتة من كل طرف "متعلق بأهله" "بتسمع كلام أمها"
ويجب توضيح الأمر من اوله وبجملة صريحة 
" انا بحبك وبحب أهلي وكل حب ليه مكانه في قلبي ولا يجوز المقارنة او المفاضلة بينهم تحت اى ظرف"
التوضيح ده هيختصر سنيين مشاكل ملهاش داعي، وسوء ظن من الطرفين لازم يتوضعله حد.
**مراتك اتجننت.
كلمة هيسمعها الراجل على الأقل مرة في حياته، ممكن من عيلته او أحد أصدقائه!
وفور ان تسمعها ايها الرجل عليك بالتراجع فورا عن موقفك وعنادتك وتصرفاتك مهما كانت من وجهة نظرك صحيحة وتعتذر عن مافعلته مهما كان..
ولتعلم عزيزى الرجل "ان مفيش ست عايزة يتقال عليها مجنونة، لازم راجل لو اللى يكون مجننها" :)
**الحب..جاروف بإيد طويلة!
بعد مرور فترة ليست بالطويلة من الزواج تبدأالشكاوى من نوعية "جوزى مش رومانسي خالص". "مراتي مش مهتمة بيا" 
وتعليقي الوحيد " يخربيت الأفلام اللى بوظت دماغ الناس"
واسمحولي احكى قصة بسيطة.. وانا حامل مكنتش باقدر أكنس الأرض علشان مش هاقدر اوطي وأحط الزبالة في الجاروف 
وفي يوم دخل عليا جوزي بجاروف بأيد طويلة مبتسما قائلا: علشان ماتوطيش وانتى بتكنسي :)
هذه هى الرومانسية بعد الجواز ياسادة .. هو صحيح ترجمة اللى حصل ده انه يقول " اهو مالكيش حجة، ياريت تنضفي البيت بقى"! بس على الأقل امتلك من اللباقة انه مايجرحش مشاعري، ويفهمني انه مقدر تعبي حتى لو ده مش حقيقي . 
**انتى مش مقدرة انا بتعب أد ايه؟
آفة الجواز اللى يومين دول ان الست بتحط راسها براس الراجل وكلام من نوعية "انا زيى زيك" "انا بتعب زيك بالظبط" "ايه يعني بتشتغل ما كل الناس بتشتغل" " انا كمان طالع عيني في البيت"
وده خطأ فادح وبيحدث شرخ عميق بين الزوجين والست عمرها مابترتاح وهى حاسة انها مظلومة ومش بتتقدّر والراجل بيفقد ثقته في دوره واهميته وبالتالي بيبيع القضية أكتر !
الموضوع ببساطة ان كل واحد فينا ليه دور بيعمله على أد طاقته وقوته .. مش ذنب الرجالة بقى ان الست ربنا خلقها تقدر تعمل مليون حاجة :D
"التقدير" .. هو الحل 
كل واحد يقدر اللى التاني بيعمله مهما كان بسيط، ويبقى عنده يقين ان التاني فعلا بيتعب ، وكل واحد ليه دوره بيأديه ولازم الطرف التاني يشكره عليه. بس كده .  
  **السعادة الزوجية.
مفيش حاجة اسمها كده أصلا :D
الجواز يعنى تعيش يومك بتفاصيله مع شخص مختلف عنك! يعنى لازم تتخانق كل يوم!
الجواز يعنى الست في عز غضبها وهى بتتخانق يبقى نفسها تضربه بأى حاجة تكسر دماغه!
الجواز يعنى الراجل ومراته بتتكلم بصوت عالي يبقى نفسه يطبق في زمارة رقبتها!
الجواز يعنى الراجل يتحكم في مراته والست تكتم على نَفس جوزها!
الجواز يعنى تتمنى مرة في اليوم ان ترجع لحياتك قبل الجواز تاني!
الجوازيعنى الست تكدب على جوزها علشان مش عايزة مشاكل والراجل يكدب على مراته علشان مش عايز نكد!
الجواز يعنى حد يعرفك أكتر من نفسك لدرجة تخنقك!
الجوازيعنى الست تكره جوزها وتكره اى حاجة تاخده منها!
الجواز يعنى الراجل يتخنق من مراته ويغِير من اى حاجة تشغلها عنه!
الجواز يعنى الراجل يبقة نفسه في أكلة معينة يرجع البيت يلاقي مراته عملاها !
الجواز يعنى الست تنسى تجيب حاجة ناقصة في البيت وجوزها يجيبها وهو راجع من شغله!
الجواز يعنى طبطبة الست على كتف جوزها وهى بتقوله "ربنا يخليك لينا" !الجواز يعنى كلمة "تسلم ايديك" يقولها الراجل لمراته بعد الغدا!
الجواز يعنى نعدى المشكلة مع بعض مش واحنا ضد بعض!
الجواز يعنى"الست مالهاش غي بيت جوزها" و" الراجل مالهوش غير مراته وعياله"!
الجواز يعنى عذاب يومي وراحة يومية !  

الجواز يعنى أصحى الصبح وانا شايلة هموم الدنيا
، وقبل ما أنام الاقي لساني بيقول "الحمد لله" :)