يعنى ايه تبقى "تخينة" ؟؟
في أى مرحلة بالظبط ؟!.. ايوه ما التُخن مراحل وكل مرحلة ليها إفيهاتها ومعاناتها وبنيتها التحتية !
*التُخن في مرحلة الطفولة..
المرحلة دى أسوأ مرحلة لأنها بتطلع من الناس اسوأ مافيهم، بتخليهم يتريقوا على عيّلة صغيرة !
تخينة وأنتى عيّلة يعنى محدش يقدر يشيلك، يقعدك على حجره، بتاخدى حيز في المواصلات، بتحسي أنك مختلفة ومش ده مكانك، الأمهات بتخاف على عيالها منك لحسن تقعدى على أبنها تفطسيه ولا حاجة !
في أعياد الميلاد والمناسبات أغنية "أجمل مافي الحفلة مين؟ دبدوبة التخينة" هى الراعي الرسمى وزفتّك في الطالعة والداخلة !
في المدرسة بتقعدى ورا علشان زمايلك مش شايفين منك ، وصفك دايما على لسان زمايلك وأهاليهم "البت التخينة دى"..
التريقة على لبسك والكرش اللى بارز وتفعيص الخدود من الصغير والكبير..
هتكبري شوية وتبقى بنوتة جميلة في أعدادى ولا ثانوى وندخل على المرحلة اللى بعدها ..
*التُخن في مرحلة المراهقة ..
مراهقة يعنى حُب، ابن الجيران وزميلي في الدرس وأى شاب خلقه ربنا في محيط أى مكان موجودة فيه ..
وكونك تخينة يعنى تفقدى الأمل .. مين هيبصلك.. مين هيعجب بيكِ.. متحاوليش .. متفكريش
أنتِ في مقياس البنات مش موجودة .. مش بس مع الولاد مع البنات نفسهم .. اللبس والشكل مختلف مش هتلاقي مجموعة تقبلك ولو قبلتك هتقبلك علشان دمك خفيف وطيبة وبتروحي كل مرة تشتري سندوتشات للشلة كلها .. أقل واحدة بتتكلمي لأن معندكيش حاجة تحكيها أصلا .. ثم لازم يكون حد في الشلة الباقي يمارس عليه نرجسيته وإحساسه بنفسه!
لحد كده الدايرة بتبقى مقفولة على المدرسة وصحابك .. بعد المدرسة ودخول المرحلة الجامعية الدنيا بتوسع وندخل على المرحلة الثالثة وأصعب مرحلة ..
*التُخن في مرحلة بداية الحياة ..
وأحنا صغيرين مهما كان مش بنشوف الدنيا صح .. تقديرنا للأمور مختلف .. لما بنوصل لمرحلة الأنسان الكامل الواعي بنشوف الدنيا بقى وبنكتشف يعنى ايه تخينة ؟.. فعلياً
تخينة يعنى أنك تلاقي مقاسك إعجاز بصرف النظر عن اللى هتلبسيه ده شكله ايه !
يعنى لو مع ناس وهتشتري أكل جاهز لازم تطلبي ربع اللى محتاجاه لأنك في كل الأحوال هتطلبي أكل كتير "من وجهة نظرهم"
يعنى مش ضروري تاكلي في أماكن عامة لأن في ناس كتير بتتقرف من منظر الناس التخينة وهى بتاكل !
تخينة يعنى أكيلة وطفسة ومش بتفكري غير في الأكل بالضرورة.
يعنى لازم تخسي علشان تلاقي عريس .
يعنى لازم تسمعي في قعدة بنات "انتى لسه سايبة نفسك كده؟.. ده أنا عملت رجيم .. في دكتور تخسيس أعرفه ..." أو على الجانب الآخر " ياستى ولا يهمك أنتِ حلوة كده .. ده في ناس هتموت وتبقى تخينة ..الرجالة بتحب البنات التخينة !"
على سيرة الدكاترة ... كل حاجة هتتعبي منها هيبقى ليها علاقة بالتُخن ..
جيوب أنفية .. التُخن بيأثر على عملية التنفس
التهاب مفاصل .. أنتِ وزنك زاد الفترة اللى فاتت ؟
الحمل اتأخر .. لازم تخسي شوية
حامل وحصل إجهاض .. التُخن ليه عامل برضه ..لازم تخسي
الحمل كمل وخلفتي .. خلى بالك بقى البيبي يورث التُخن ده
أبنك ولا بنتك كبر وبقى تخين .. أنتِ السبب طبعا
حياة التخينة ممكن تبقى سهلة جدا .. لو مفيش ناس حواليها.
حياتى بقت صعبة من زمايلي وجيراني وأهلى ومعارفي والمجتمع والناس ..
كبرت وانا بسمع التريقة من كل اللى قابلتهم لحد مابقيت حريفة تريقة "على نفسي" بقيت بسبق اللى قدامي في التريقة لدرجة انه مش بيلاقي حاجة يقولها
التريقة بقت حرفة .. حرفة اواجه بيها رزالة خلق الله وأواجه في نفس الوقت مرضي .. ايوه التُخن مرض .. ومرض مزمن كمان حتى لو أتخلصنا منه .. التخين هيفضل تخين مهما عمل
دى حاجة كده في الجينات .. حاجة هتلازمك عمرك كله .
في الأول كنت راضية قوى .. لافارق معايا تريقة ولا أستفزاز " ودلوقتى برضه مش بيفرق معايا " بس انا مبقتش راضية عن نفسي ..
زمان كنت بضحك على نفسي " أنا مكنتش شايفة نفسي تخينة أصلا" بس ده كان هروب .. كان تغييب عن الواقع الحقيقي
أعترافي لنفسي انى تخينة كان اصعب حاجة واجهت بيها نفسي ، وقوفي قدام المراية وكره اللى شايفاه كان شىء سخيف حقيقي .
لكن الأصعب كان التعامل مع المرض ده ..
من أول الدكتور اللى بيتعامل معايا على أنى كائن مقزز مقرف معندهوش إرادة ومش عارف يتحكم في شهوته "الأكل"
مرورا بالممرضة المتأففة وصولا للناس اللى حواليا اللى مستنيين يشوفوا هاخس إزاى ومراقبتهم ليا !
كفاية بس الناس تعرف أنك بتعمل رجيم علشان يبدأوا يحسبوا عليك اللقمة !
خسارة الوزن مش مستحيلة ولا صعبة .. فعلا ده حقيقي
ورجوعه أسهل بكتير على فكرة ..
بس بيرجع بإحباط وضيق وكسرة نِفس
كل اللى بتمناه أنى ارجع لمرحلة الرضا عن نفسي تاني حتى لو أفضل تخينة !
****
معالجة موضوع التُخن في برامج الصحة الأمريكية معالجة مختلة .. برامج أمريكا لازم تطلع التخين ده كائن مثير للشفقة كائن تعيس حزين مقرف هيموت بدري وهو عنده أمراض الدنيا ..وطبعا بيشجعوه يخس بكل حماس علشان يحظى بصحة جيدة وكمان يحظى بسكس لايف سعيدة !
بيحبوا يركزوا على النقطة دى قوى !
يعنى في كل الأحوال أنت بالنسبة ليهم حيوان شهواني فبيحاولوا بس يغيروا شهوانيتك لمجال تاني !
معالجتها في البرامج العربي بقى ضحلة .. يعنى ناس مش فاهمة أى حاجة فبتقول أى حاجة !
ده طبعا غير أن التُخن في المسلسلات والأفلام والأعلانات هى وسيلة لأضحاك المشاهد مش أكتر يعنى !
زى ماقلت حياة التخين ممكن تبقى سهلة قوى . لو مفيش ناس حواليه ..
ناس تتريق .. تسخف.. تلقح كلام
التخين مش محتاج شفقة ولا محتاج احترام برضه
يعنى لو هو شخص كويس عامله كويس لو هو وحش سيبك منه .. بس من غير مايبقى ده ليه علاقة بشكله ولا بجسمه..
متوصفش حد بأنه تخين .. متقولش الكلمة اصلا ولو قلتها جواك حاول ماتطلعهاش على لسانك.
بلاش نظرات القرف أو الشفقة ..
بلاش تعلمي ابنك يتريق على صاحبه التخين ، بلاش اصلا تعلميه الكلمة دى في توصيف الناس
كفاية أن بنتي عرفت الكلمة من زميلة ليها في المدرسة ورجعت علشان تسألني "هو أنا تخينة ياماما ؟! ..أنا مش عايزة أبقى تخينة زيك "
أنا فعلا معنديش مشكلة بنتى متقبلش شكلي .. لكن فعلا هتبقى مشكلة لما متقبلش شكلها هى!
ومفيش إجابة هتبقى صح ومفيش تصرف هيبقى صح .. بنتى دخلت الدوامة خلاص.. كله بسبب بنت أمها معرفتش تعلمها الذوق ولا الأدب
متحكمش على حد تخين بإنه معندهوش إرادة علشان مش عارف يخس أو انه ضعيف قدام الأكل..
أو كما قال الرجل في رواية "هيبتا"
متحكمش عليه أصلا .. أنت مال أهلك !
تعليقات
إرسال تعليق