أنا السبب

أنتِ السبب..
قالها صارخاً وتركني ألوم نفسي فيما جرى له هو !
وقعت في دوامة تلك الجملة كتير، في همها ومسئوليتها
لحد ماكرهتها ..
مفيش حد السبب .. كل واحد مسئول عن نفسه، عن اللى بيعمله، عن أى نتيجة بيوصل ليها..
وبالتالى محدش مسئول عن اللى بيحصلي .. أنا السبب في كل ما آلت إليه أمورى .. حُلوها ومُرها، أنا من أخترت وليس أحداً آخر !
الحلو أنا اللى أخترته والمُر موقفتش قصاده ولا حاولت أمنعه!
عمرى ما هاتقدم طول ما أنا بلوم غيري على اللى بيحصلي، وعمرى ما هعيش مبسوطة ومرتاحة طول ما أنا شايفة أن السبب مش فيا !
***
قعدت فترة طويلة ألوم جوزي بأنه مش بيسمعني! الكلام بعيده وأزيد فيه وبرضه مفيش فايدة ! لحد ما أبنى كبر وبقى عنده نفس التصرف بنفس الطريقة، بصرف النظر أن ده تصرف رجولي صرف يعنى لكن أنا مش بتضايق من أبنى وبتضايق من جوزى !
والسبب بسيط جدا .. أنى متوقعة ومنتظرة من جوزى تصرف معين ومش مستنية من ابنى ولا متوقعة منه حاجة
السبب في نظرتي المختلفة بينهم .. السبب فيا أنا ..
بتعب من شغل البيت علشان مش بسمح لحد يساعدني، بنتي وقعت في مشكلة علشان أنا موقفتش جنبها ولا سيبتها تحكي، بيتي مكركب علشان أنا مش عارفة أنظم وقتي، زعلت من فلان علشان سمحتله يضايقني ، اتخنقت من فلانة علشان أديتها فرصة تتدخل في حياتي ، سمحت لفلان يهيني علشان محطتش حدود للتعامل بينا،،، وهكذا..
بطلّت ألوم غيري،وبقيت مسمحش لحد انه يلومني.
كل واحد مسئول عن نفسه، عن تصرفاته ونتايجها
مسئول عن إحساسه بغيره واللى مستنيه منهم
مقدرش ألوم غيري على تصرفه معايا أياً كان علشان أنا اللى بسمح بالتصرف ده.
إحساسي بالمسئولية تجاه تصرفاتي على أد مابيشيّلني الهم أكتر على أد مابيحررني من لوم غيري وإحساسي بالذنب تجاه أى حد تانى..
حررّني من لعب دور الضحية وأنى لايمكن أفكر أعيش فيه وحررّني من تصديقه لو صدر من أى حد قدامي ..
حررّني من الندم على اللي فات ومن الحزن من ناس فارقت حياتي أصلا!

المسئولية حرية .. معرفش إزاى بس ده حقيقي والله :)