القواعد الأربعون للسعادة الزوجية
القواعد الأربعون للسعادة الزوجية أو ماتيسر يعنى :)
1- مفيش حاجة إسمها سعادة زوجية.
2- مفيش قواعد محددة بتُحكم أى جواز، كل جواز له قواعده الخاصة .
3- كل اللى اتعلمناه من علاقات حوالينا او كتب أو أفلام معظمه غلط وتهييس.
4- الأحكام المطلقة اللى بتوصف الستات عموما أو الرجالة عموما بنظلم بيها نفسنا قبل أى حد .
4- في بداية الجواز قللّوا التوقعات .. قللّوها جدا .. خلّوها في درجاتها الأدنى.
5- الراجل اللى حبتيه وأتخطبتيله غير الراجل اللى هتتجوزيه، البنت اللى حبيتها وأتخطبتلها ليها نسخة أفضل هتشوفها بعد الجواز.
6- الست بتتخلص من إرتباطها بأهلها أسرع من الراجل، الراجل بياخد وقت طويل علشان يخرج من تحت سيطرتهم وممكن مايخرجش خالص .. إنتِ وحظك !
7- الأهل السبب الأول والرئيسي في خلافات بداية الجواز.. دى شماعة ! الخلافات بينكم إنتم واجهوها .
8- الخطيئة الكبرى اننا بعد كل مشكلة نروح نحكي لأهالينا، أحنا بننسى وحياتنا بتستمر وأهالينا بيفضلوا شايلين لآخر العمر .
9- ياريت نخرّج أهالينا برة خالص أصلا علشان الدنيا تمشي .
10- ماتغلطوش في أهالى بعض.
11- لما الراجل يشتكي من إنك بتهتمي بعيلتك زيادة بيبقى قصده ياريت ألاقي منك نفس الأهتمام أو أنا حاسس إنك مش مهتمة بيا ... ولما الست تشتكي بإنها حاسة مالهاش قيمة عندك زى عيلتك بيبقى قصدها أنا عايزة أحس إنك بتشترى خاطرى وأنى مهمة عندك .. العلاقة بين الكلمة ومعناها معقدة وكده .
12- تانى .. الخلافات بينكم إنتم .. واجهوها.
13- إنتو مالكوش غير بعض .
14- الراجل بيغير من أى حد بيهدد أمانه الشخصي .. يعنى يغيرمن ابن خالتك اللى مامتك وخالتك كان نفسهم تتجوزوا برغم ان انتو أخوات فعلا ومايغيرش من صاحبه اللى بيرميكي بنظرات يمين وشمال بس هو عادى بيثق فيه ! .. ماتخديش الموضوع على صدرك قوى .
15- الست اللى مابتغيرش دى واثقة من نفسها ومنك، مش معناها إنها مبتحبكش !
16- جوزك على ماتعوديه وإبنك على ماتربيه .. ده مثل صحيح تماما .. في أول الجواز بلاش تدخلى بصدرك وبحماس " دى النصيحة الشريرة الوحيدة اللى هاقولها للست "
17- بلاش ترمي وَرَقك كله في أول الجواز، يعنى دايما خلى حاجة للست تعمل حسابك فيها وإنها مش لازم تعدى الخط ده علشان ماتخسركش أو متزعلكش " دى برضه النصيحة الشريرة الوحيدة اللى هاقولها للراجل"
18- حاولوا ماتخبوش حاجات كتير عن بعض ، أعملوا آلية للتفاهم والمصارحة .. الأسرار بتبقى عبء بعد كده ممكن يهدد الجوازة من اساسها.
19- متمسكوش على بعض ذللّ، هو يبقى عايش ماسك ذلّة عليها يطلعها وقت اللزوم وهى تمسك عليه ذلّة تنكد على أمه بيها بعد كده ! دى مش عيشة ! بلاها منها جوازة والله .
20- تسلم إيدك، ربنا يخليك ليا، بحبك ، أنا مقدرش أستغنى عنك .. خلوها عادة على لسانكم حتى لو مش حاسينها .. قولها وخلاص .
21- المسوا بعض .. المسوا بعض دايما .. طبطبة على الكتف وانتى قاعدة جنبه .. ماسكة ايد وهى معديّة جنبك .
22- العلاقة الحميمية بينكم ممكن تحل مشاكل آه .. هتحلها بشكل وقتي .. يعنى نصيحة الست العُقر بإنك تتدلعي عليه وتلبسي قميص نوم أحمر دى نصيحة فشنك علشان الراجل بنى آدم مش حيوان والنعمة ! بيبفهم ويحس يعنى .
23- حاول تحضنها من غير أى غرض .. أحضنها بس .
24- بلاش أعصابكم تفلت مع بعض .. لو واحد إتنرفز لازم التاني يبقى هادى .. لو انتو الأتنين صوتكوا علي على بعض في نفس الوقت المشكلة هتتأزم وتكبر.
25- الراجل مش بيحب الست اللى بتحط راسها براسه، حاولى تبعدى عن النقطة دى في الخناق .
26- انتو مالكوش غير بعض .
27- لما الست تعيط في الخناقة لازم توقفّ الخناقة فورا .. خدها في حضنك،طبطب عليها، قولها آسف حقك عليا .. المشكلة هتخلص وهتعمل اللى انت عايزه .. آه والله .
28- اتفقوا من اللى هيربي العيال .. مين اللى هيشدّ ومين اللى هيدلع يعنى .
29- هزار الحب والخطوبة اللى كان بينكم من باب الدلع وكده لازم يقف بعد الجواز .
30- احترموا بعض .. بجد والله احترموا بعض بقوة وبكل الطرق اللى تقدروا عليها .
31- التقدير .. جو التقدير خسرنا كتير ده مش هينفع .. لازم تقدّر وجودها في حياتك، وأنتى لازم تقدّري وجوده في حياتك .
32- علاقتكم لازم يبقى ليها الأولوية بين كل العلاقات اللى بتربطكم ببقية خلق الله اللى حواليكم مهما كانوا قريبين .
33- أدوا مساحة لبعض ، مساحة لكل واحد يمارس هوايته أو يعمل حاجة نفسه فيها .. الجواز هيبقى قطعة من الجحيم لوطرف حسّ مجرد إحساس إن الطرف التانى كاتم على نفسه ومقيّد حريته .
34- الجواز حلو .. ساعات يعنى :)))
35- متسمعوش كلام ناس متجوزتش، مهما كان كلام صح وزى مابيقول الكتاب .
36- وقت الغضب بلاش الأسرار والنواقص تطلع لناس برة .. ده مش لازم يحصل أبدا ابدا .
37- متعودوش نفسكم تتكلموا عن بعض وحش في ضهر بعض حتى لو كان بهزار .
38- زى ما الجواز مشاكله كتير، لحظات سعادته متتوصفش..
نظرة عينه لما تقوليله أنا حامل لأول مرة، البوسة اللى على جبينك ونبرة صوته وهو بيقولك حمدلله على السلامة، ولما تفقدتى جنين ويسيبك تعيطي في حضنه لحد ماتزهقي،
لما يجيى في صفك وانتى بتزعقى لعيل من عيالك، لما يعمل آخرحاجة كنتى متوقعاها
منه، لما يسيبك تزعقى من ضيقتك من غير مايرد، لما يشيل عنك عيل من العيال وانتى تعبانة ، لما يجيبلك حاجة نفسك فيها ، لما يتنازل عن عناده ويسيبك تعملى اللى نفسك فيه .
لما يخسر شغل وفلوس وحد عزيز وميلاقيش منك غير طبطبة على الكتف وكلمة مش مهم .. المهم انت معانا وبخير .
39- انتو مالكوش غير بعض .
40- ولأن محدش بيعمل بنصايح حد، خوضوا تجربتكم زى ماتحبوا، وكل أملى إنكم تكتشفوا إنكم مالكوش غير بعض بدرى ، بدرى قوى .. مش وانتو بتكتبوا تدوينة بمناسبة عيد جوازكم ال13 !
1- مفيش حاجة إسمها سعادة زوجية.
2- مفيش قواعد محددة بتُحكم أى جواز، كل جواز له قواعده الخاصة .
3- كل اللى اتعلمناه من علاقات حوالينا او كتب أو أفلام معظمه غلط وتهييس.
4- الأحكام المطلقة اللى بتوصف الستات عموما أو الرجالة عموما بنظلم بيها نفسنا قبل أى حد .
4- في بداية الجواز قللّوا التوقعات .. قللّوها جدا .. خلّوها في درجاتها الأدنى.
5- الراجل اللى حبتيه وأتخطبتيله غير الراجل اللى هتتجوزيه، البنت اللى حبيتها وأتخطبتلها ليها نسخة أفضل هتشوفها بعد الجواز.
6- الست بتتخلص من إرتباطها بأهلها أسرع من الراجل، الراجل بياخد وقت طويل علشان يخرج من تحت سيطرتهم وممكن مايخرجش خالص .. إنتِ وحظك !
7- الأهل السبب الأول والرئيسي في خلافات بداية الجواز.. دى شماعة ! الخلافات بينكم إنتم واجهوها .
8- الخطيئة الكبرى اننا بعد كل مشكلة نروح نحكي لأهالينا، أحنا بننسى وحياتنا بتستمر وأهالينا بيفضلوا شايلين لآخر العمر .
9- ياريت نخرّج أهالينا برة خالص أصلا علشان الدنيا تمشي .
10- ماتغلطوش في أهالى بعض.
11- لما الراجل يشتكي من إنك بتهتمي بعيلتك زيادة بيبقى قصده ياريت ألاقي منك نفس الأهتمام أو أنا حاسس إنك مش مهتمة بيا ... ولما الست تشتكي بإنها حاسة مالهاش قيمة عندك زى عيلتك بيبقى قصدها أنا عايزة أحس إنك بتشترى خاطرى وأنى مهمة عندك .. العلاقة بين الكلمة ومعناها معقدة وكده .
12- تانى .. الخلافات بينكم إنتم .. واجهوها.
13- إنتو مالكوش غير بعض .
14- الراجل بيغير من أى حد بيهدد أمانه الشخصي .. يعنى يغيرمن ابن خالتك اللى مامتك وخالتك كان نفسهم تتجوزوا برغم ان انتو أخوات فعلا ومايغيرش من صاحبه اللى بيرميكي بنظرات يمين وشمال بس هو عادى بيثق فيه ! .. ماتخديش الموضوع على صدرك قوى .
15- الست اللى مابتغيرش دى واثقة من نفسها ومنك، مش معناها إنها مبتحبكش !
16- جوزك على ماتعوديه وإبنك على ماتربيه .. ده مثل صحيح تماما .. في أول الجواز بلاش تدخلى بصدرك وبحماس " دى النصيحة الشريرة الوحيدة اللى هاقولها للست "
17- بلاش ترمي وَرَقك كله في أول الجواز، يعنى دايما خلى حاجة للست تعمل حسابك فيها وإنها مش لازم تعدى الخط ده علشان ماتخسركش أو متزعلكش " دى برضه النصيحة الشريرة الوحيدة اللى هاقولها للراجل"
18- حاولوا ماتخبوش حاجات كتير عن بعض ، أعملوا آلية للتفاهم والمصارحة .. الأسرار بتبقى عبء بعد كده ممكن يهدد الجوازة من اساسها.
19- متمسكوش على بعض ذللّ، هو يبقى عايش ماسك ذلّة عليها يطلعها وقت اللزوم وهى تمسك عليه ذلّة تنكد على أمه بيها بعد كده ! دى مش عيشة ! بلاها منها جوازة والله .
20- تسلم إيدك، ربنا يخليك ليا، بحبك ، أنا مقدرش أستغنى عنك .. خلوها عادة على لسانكم حتى لو مش حاسينها .. قولها وخلاص .
21- المسوا بعض .. المسوا بعض دايما .. طبطبة على الكتف وانتى قاعدة جنبه .. ماسكة ايد وهى معديّة جنبك .
22- العلاقة الحميمية بينكم ممكن تحل مشاكل آه .. هتحلها بشكل وقتي .. يعنى نصيحة الست العُقر بإنك تتدلعي عليه وتلبسي قميص نوم أحمر دى نصيحة فشنك علشان الراجل بنى آدم مش حيوان والنعمة ! بيبفهم ويحس يعنى .
23- حاول تحضنها من غير أى غرض .. أحضنها بس .
24- بلاش أعصابكم تفلت مع بعض .. لو واحد إتنرفز لازم التاني يبقى هادى .. لو انتو الأتنين صوتكوا علي على بعض في نفس الوقت المشكلة هتتأزم وتكبر.
25- الراجل مش بيحب الست اللى بتحط راسها براسه، حاولى تبعدى عن النقطة دى في الخناق .
26- انتو مالكوش غير بعض .
27- لما الست تعيط في الخناقة لازم توقفّ الخناقة فورا .. خدها في حضنك،طبطب عليها، قولها آسف حقك عليا .. المشكلة هتخلص وهتعمل اللى انت عايزه .. آه والله .
28- اتفقوا من اللى هيربي العيال .. مين اللى هيشدّ ومين اللى هيدلع يعنى .
29- هزار الحب والخطوبة اللى كان بينكم من باب الدلع وكده لازم يقف بعد الجواز .
30- احترموا بعض .. بجد والله احترموا بعض بقوة وبكل الطرق اللى تقدروا عليها .
31- التقدير .. جو التقدير خسرنا كتير ده مش هينفع .. لازم تقدّر وجودها في حياتك، وأنتى لازم تقدّري وجوده في حياتك .
32- علاقتكم لازم يبقى ليها الأولوية بين كل العلاقات اللى بتربطكم ببقية خلق الله اللى حواليكم مهما كانوا قريبين .
33- أدوا مساحة لبعض ، مساحة لكل واحد يمارس هوايته أو يعمل حاجة نفسه فيها .. الجواز هيبقى قطعة من الجحيم لوطرف حسّ مجرد إحساس إن الطرف التانى كاتم على نفسه ومقيّد حريته .
34- الجواز حلو .. ساعات يعنى :)))
35- متسمعوش كلام ناس متجوزتش، مهما كان كلام صح وزى مابيقول الكتاب .
36- وقت الغضب بلاش الأسرار والنواقص تطلع لناس برة .. ده مش لازم يحصل أبدا ابدا .
37- متعودوش نفسكم تتكلموا عن بعض وحش في ضهر بعض حتى لو كان بهزار .
38- زى ما الجواز مشاكله كتير، لحظات سعادته متتوصفش..
نظرة عينه لما تقوليله أنا حامل لأول مرة، البوسة اللى على جبينك ونبرة صوته وهو بيقولك حمدلله على السلامة، ولما تفقدتى جنين ويسيبك تعيطي في حضنه لحد ماتزهقي،
لما يجيى في صفك وانتى بتزعقى لعيل من عيالك، لما يعمل آخرحاجة كنتى متوقعاها
منه، لما يسيبك تزعقى من ضيقتك من غير مايرد، لما يشيل عنك عيل من العيال وانتى تعبانة ، لما يجيبلك حاجة نفسك فيها ، لما يتنازل عن عناده ويسيبك تعملى اللى نفسك فيه .
لما يخسر شغل وفلوس وحد عزيز وميلاقيش منك غير طبطبة على الكتف وكلمة مش مهم .. المهم انت معانا وبخير .
39- انتو مالكوش غير بعض .
40- ولأن محدش بيعمل بنصايح حد، خوضوا تجربتكم زى ماتحبوا، وكل أملى إنكم تكتشفوا إنكم مالكوش غير بعض بدرى ، بدرى قوى .. مش وانتو بتكتبوا تدوينة بمناسبة عيد جوازكم ال13 !
تعليقات
إرسال تعليق