هاتولي رااجل (10)

طيب .. هو مين بقى الراجل ؟
أو بمعنى أصح .. امتى نقول على راجل انه "راجل" ؟!
دى أكتر حاجة أنا اتربيت عليها غلط وفهمتها غلط وللأسف اتعاملت بيها معظم فترات حياتي على أساس الغلط ده .
ولأن أول راجل عرفته في حياتي كان بابا وأول ست أشوفها بتعامل راجل كانت أمي فطبيعي التعامل ده بالنسبة ليا كان يبقى هو الصح وهو القاعدة والباقي مش طبيعي !
بابا كان وحيد والديه وجه بعد اربع بنات "جه بعد شوقة" ومن هنا سُمّى "شوقي"   :D
ومش بس كده ده صعيدي كمان ! بإختصار عاش والدى كملك متوّج بين أمه وأخواته البنات ! وبعد أن تزوج حرصت أمي على إستكمال المسيرة ..  فكانت الرجولة من وجهة نظري "هى الترفع عن العائلة والأنعزال عنها وترك الأمور للزوجة هى تشيل الليلة والراجل دوره يشتغل ويصرف على البيت " ..
وكبرت على كده، تزامنت وجهة النظر دى مع قراءة رجل المستحيل "أدهم صبري" وسخريته اللاذعة اللى كان مبهدل بيها الأخت "منى توفيق" ..
يبقى الصورة المطبوعة في دماغي عن الراجل " مترفع، تقيل، مش في دماغه وطبعا بيسخر من الست براحته " !!
******
في فترة خطوبتي وفي قعدة تضم كبار العائلتين ورجالها وهم بيتفقوا على تفاصيل الجواز والفرح والشقة كنت انا وجوزي "خطيبي وقتها" قاعدين ، وفي عز ما الناس بتقرر وفي نقطة خلافية  لقيت جوزي بيقولي " رأيك ايه ؟ ماتقولي حاجة ؟! "
عنفه والده بشدة وبضحكة تداري تلك الشدة قائلا " انت بتسألها" !
مش المشكلة في رد فعل الوالد ..المشكلة الحقيقة كانت في رد فعلي أنا، انا كنت متضايقة انه سألني ! وقلت نفسي إزاى راجل ويسأل ست في قعدة المفروض انها قعدة رجالة ؟!
*****
وانا صغيرة .. مش صغيرة قوى يعنى في ثانوى كده
رُحت فرح .. مش فاكرة فرح مين بس كل اللى كنت فاكراه العريس اللى كان مشغول بديل فستان العروسة أكتر من العروسة نفسها ! ماشي جنبها ووراها يحاسب على الديل ليوقعها أو يكعبلها أو تدوس عليه ! تركب العربية يشيلهولها .. تطلع سلم يمسكه ليها يسندها!.. كنت هاتفرس وكان هاين عليا اروح اقوله "استرجل بقى مش كده "!
من عبطي مكنتش أعرف انه هو كده "بيسترجل " فعلا !
*******
دلوقتى سعادتي بتكتمل لما أمشي في السوق واسمع واحد بيقول لمراته في التليفون " انا جبتلك فاصوليا وكوسة عايزة ايه تانى؟" وبيبقى هاين عليا أشُد على يده من فرط الأحترام .
لأن الراجل اللى بجد هو اللى الست تقدر تعتمد عليه .. مش انه يبقى قوى وشجاع ومقدام وبيتصدى لأعدائه بأطرافه الأربعة "ايوه بلقح كلام على أدهم صبري :D"
لأ ..تعتمد عليه انه يجبلها الخضار وهو راجع من الشغل، يغيّر الأنبوبة لما تفضى، يسلك بلاعة الحمام لما تتسد، يغسلها المواعين لما تبقى تعبانة، يشيل منها العيل الصغير لما حيلها يتهد، يسيبها نايمة شوية كمان، يقولها ربنا يخليكي ليا وتسلم إيدك ، ولو مقالش كلمة حلوة مايقولش كلمة وحشة تضايقها ..
يعرف قيمتها ويشكّر فيها قدام الناس، لما يجي ضيوف مايتكسفش يساعدها قدامهم، يسيب نايبه من الفرخة علشان العيال تتعشى بيه . مايبخلش على بيته مش بس بماله .. الأهم انه مايبخلش عليهم بوقته .
يعنى بإختصار المقولة اللى طلعت في الأعلان "الراجل مش بقوته .. الراجل برعايته لبيته لأسرته " والتى أشبعناها تريقة وإستخفاف .. هى مقولة صحيحة تماما !
****
لايمكن أن انهي تلك التدوينة دون أن اوجه شكر لمن دفعني دفعا لكتابتها ..
 "عمر طاهر" الذي كتب أستاتيس على الفيس بوك قال فيها " مبروك لأم رقية على الجايزة وشكرا لأنها خدتني معاها " لانه بتلك العبارة أعاد لي الثقة في الصعايدة بأنهم رجال كما يقال عنهم .
وزوجي الذي تبين إنه عندما سألني في القعدة إياها  " رأيك ايه؟ ماتقولي حاجة ؟! " كان الأكثر فهما لمعنى الرجولة بين كل الشنبات اللى كانت قاعدة !