في حب التوأمتان ..

الدنيا بتتغيّر وأحنا بنتغيّر .. مفيش حاجة ثابتة ولا دايمة !
وأهم حاجة بتتغيّر هى المشاعر والقلوب.. والقلب لو مكنش وظيفته انه يتقلّب كل شوية في مشاعر مختلفة مكنش ربنا خلانا ندعي "ربنا لاتزغ قلوبنا بعد إذ هديتنا " ولا كان ذكر الدعاء في القرآن .
علشان كده لازم نقدّر المشاعر اللى بنمر بيها لأنها غالبا ، لأ مش غالبا ده أكيد إنها هتنتهي في وقت معين أو على أقل تقدير هتتغير ويحل محلها مشاعر مختلفة .
وإعمالا بالكلمتين اللى فاتوا دول أنا قررت أكتب التدوينة دى..
علشان أقول لبنتين حلوين إني بحبهم حبا كبيرا :)
آية وندى عاشور ..
آية عرفتها قبل ندى بفترة طويلة وكان تعارف صدامي الحقيقة
كنا مختلفين ومازلنا على ما أعتقد، تصادمنا في البداية بشكل قوى وفج !وبرغم الأختلاف آية أخترقت قلبي إختراقاً..
مش قادرة افتكر أحنا بدأنا نتفاهم أمتى ؟! أو يمكن مش قادرة أفتكر لأننا لسه ماتفهمناش بس على الأقل عارفين نتعامل
آية أكتر شخصية قابلتها في حياتي قدرت تتغيّر في وقت قصير
مش للأحسن ولا للأوحش .. اتغيرت وبس
مقاوحة زيي ! ايوه .. آية شبهي علشان كده حبيتها من اول لحظة بس آية النسخة الأفضل ..النسخة المعدلّة .. النسخة اللى كان نفسي أكونها بس معرفتش ..
وجود آية ومعرفتي بيها أعاد إبتسام الحقيقية للحياة مرة أخرى "ودى حاجة مش هاعرف أشرحها"
كل اللى أقدر اقوله ان انا أتمنى حقا ومن قلب صادق تماما أن تحقق كل ماتريده هى وتتمناه لانه وبشكل ما هتكون بتحقق ما أتمناه انا أيضا !
ندى عرفتها بعد فترة طويلة من معرفتي باآية .. أكدب لو أقول أنى اعرف ندى كويس ! .. ندى مش بتتكلم كتير ..
لكن كل مرة بتتكلم بتفاجئنى فعلا ده غير أنى بحب اقرأ كلامها واتكلم معاها عموما  ..  لااستطيع توقع أبدا ردود افعالها، هناك شىء من الغموض ، أعتقدت في فترة ما أنها شخصية سهلة "سهلة التفاهم والتعامل أقصد" بس أتضح مع الوقت أن ده مش حقيقي أو هكذا أعتقد .. ندى لم تخترق قلبي ولكنها تسللت إليه برفق..
الخلاصة .. أنا حبيت وأنتهيت :D
غريب فعلا أننا نحب ناس ونتعلق بيهم من غير مانقابلهم حتى ولا مرة في حياتنا ويمكن مانقابلهمش كمان !
نرتبط بيهم ويبقى وجودهم مهم في حياتنا! وجودهم بيأثر وغيابهم بيفرق !
بيعلمونا من غير مايحسوا ولا يقصدوا !

أحبكما أيتها الفتاتان .. وأتمنى أن أظل احبكما لأطول فترة ممكنة
وأن يكون الوقت الذي سيأتى حتما واقرأ هذه التدوينة كذكرى لأيام مضت ومشاعر أنتهت ..بعيدا بعيدا